Sunday, 23 April, 2017
cunning-fox

జిత్తుల‌మారి న‌క్క‌

ఆడవిలో కుందేళ్లన్నీ ఒకచోట ఆడుకుంటున్నాయి. అటుగా వచ్చిన నక్క ఏదో ఒక ఉపాయంతో రోజుకో కుందేల్ని ఆహారంగా తీసుకెళ్లి కాలం గడపాలని అనుకుంది. వాటి ద‌గ్గ‌రికెళ్లి, మిత్రులారా. అసలు మీకు ఈ సంగతి తెలుసా? మన రాజు సింహానికి జబ్బు చేసింది. నేనిప్పుడు అక్కడి నుంచి వస్తున్నాను అని చెప్పింది నక్క. అయ్యో, అలానా అని విచారం వ్యక్తం చేశాయి కుందేళ్లు. రాజుగారికి పెద్ద కోతి వైద్యం చేస్తోంది. నెల రోజుల పాటు రోజుకో కుందేల్ని తింటే తప్ప జబ్బు నయం కాదట. అందుకే మీలో ఒకర్ని పట్టుకు రమ్మని రాజాజ్ఞ అని నమ్మబలికింది నక్క. ఆ మాటను నమ్మి రాజంటే ఉన్న భయంతోనూ, భక్తితోనూ రోజుకో కుందేలు నక్క వెంట వెళ్లసాగింది. నక్కదాన్ని చంపి రాజు పేరుమీద మాంసాన్ని కడుపారా లాగిస్తుండేది. నాలుగు రోజుల తర్వాత రాజవైద్యుడు కోతి కుందేళ్ల దగ్గరకు వచ్చింది. కుందేళ్లు రాజుగారి ఆరోగ్యం గురించి అడిగాయి. వాటి మాటలు విని కోతి పెద్దగా నవ్వి, రాజుగారికి ఏ ఆనారోగ్యమూ లేదు. జత్తుల మారి నక్క మిమ్మల్ని మోసం చేసి దాని ఆకలి తీర్చుకుంటోంది. అని చెప్పింది. దాంతో కుందేళ్లు నక్కకు తగిన బుద్ది చెప్పాలనుకున్నాయి. మర్నాడు నక్క ఒక కుందేలును తీసుకెళ్లడానికి వచ్చింది. నక్క బావా కాసేపు తాడును లాగే ఆట ఆడుకుందామా? మేమంతా ఒకవైపు ఉంటాం. నువ్వొక్కడివీ మరోవైపు ఉండాలి. ఎవరు గట్టిగా లాగితే వారి విజేత అని చెప్పాయి కుందేళ్లు. ఓస్ ఇంతేనా! అంది నక్క, కుందేళ్లన్నీ ఒకవైపూ నక్క ఒక్కటీ ఒకవైపూ ఉండి తాడును పట్టుకుని బలంగా లాగడం మొదలుపెట్టాయి. నక్క పూర్తి బలం ఉపయోగించడం చూసి కుందేళ్లన్నీ కూడబలుక్కొని తాడును వదిలేశాయి. నక్క ఒక్కసారిగా వెనకాలున్న పెద్దబావిలో పడిపోయింది. దాని పీడ వీరగడైనందుకు కుందేళ్లన్నీ సంబర పడ్డాయి.